好多年前就聽聞過唱歌有「感染力」一說。呢個係一個非常抽象嘅概念。好聽咪好聽囉，咩叫「感染力」? 第一個我聽人講過有「感染力」嘅歌手就係陳奕迅。今次Fear and Dreams Live 2022，Eason用表演親自解釋左一次何謂「感染力」。
如果牛頓以一個蘋果証明地心吸力嘅存在，咁Fear and Dreams Live 2022就係陳奕迅証明「感染力」存在嘅蘋果。
無「山頂嘅朋友你地好嗎?」，無唱最主流嘅歌曲。今次陳奕迅演唱會分四個部分，每個部分都係靠幾首side track貫穿，歌與歌之間環環相扣，但係觀眾對歌嘅認識未必好深入，Eason亦都無留位俾自己講野。咁嘅編排，要炒㷫個場只可以靠陳奕迅自己把聲。不過Eason話俾大家知，人地係怕唔講野炒唔㷫個場，陳奕迅係怕講野會淋熄個場。Fear and Dreams Live 2022就係印證佢嘅感染力嘅試金石，如果牛頓以一個蘋果証明地心吸力嘅存在，咁Fear and Dreams Live 2022就係陳奕迅証明「感染力」存在嘅蘋果。
如果有人可以用歌聲揭開恐懼嘅幔幕 打開夢嘅門扉 果個一定係陳奕迅
演唱會嘅第一部分係對人類行為嘅控訴，由《2001太空漫遊》揭幕，一連幾首歌，Eason在音色上一層一層加強，張力非常強勁，配合強勁音樂同埋舞台效果托出世界末日嘅逼在眉睫和恐懼。第二部分由宏觀世界鑽入微觀人生，《黑洞》，《龍舌蘭》，《異夢》，《如果這一秒鐘你跟我講你不愛我》，《黑夜不再來》，《開不了心》— 另一輪嘅side track。呢個部分他佢多左以無奈感，歇斯底里唱腔帶出人嘅陰暗面，最後嘅《開不了心》再以坦蕩直接嘅歌聲講出「咁你係唔開心吖嘛，唔洗逃避架!」，為之前凝聚嘅情感找出口。去到呢個位，相信大家都明白點解佢一直都唔同觀眾互動啦。
第三部分，探討生命輪迥嘅一個部分，除左《告別沙婆》之外，其他歌曲演繹偏向平淡，加埋《垃圾》最後三句清唱 :「灰燼裏被徹底消化，我以後全無牽掛 ，什麼都不怕。」，餘韻飄蕩不散，生死輪迥? 淡然面對啦! 既然生死都可以淡然面對，去到第四部分又何不活在當下呢? 《夢的可能》，《任我行》，《四季》，《人生馬拉松》，《與我常在》，《忘記歌詞》，《Life goes on》，《大人》，《致明日的舞》呢度只有一個信息 : 「唔好諗咁多啦，過左今日先啦!」就算忘記歌詞，Life/Live 一樣可以Goes On! 呢幾首歌，佢用聲應該係成晚最溫暖嘅聲線，到《致明日的舞》，強烈而溫暖嘅日出感覺出晒嚟，如果你有響現場，應該都會感受到。第四部分尾二一首《700年後》明顯為開場嘅《2001太空漫遊》嚟個呼應，「因為大家對地球嘅破壞，攪到諗住搬去太空住? 不如珍惜下而家擁有嘅野啦!」
只要我地做到活在當下，珍惜我地居住嘅星球，擁抱捉緊可珍惜嘅野，勇敢坦誠面對自己嘅七情六慾，我地就可以響最繽紛嘅螢光幕之下，以最高漲嘅情緒高呼一聲《我們萬歲》!
